БИШКЕК, 24-июл. — Sputnik. Пандемия учурунда Кыргызстандын медицина тармагына 11 мамлекет жана 65 уюмдан гуманитардык жардам келип түштү. Бул туурасында Саламаттык сактоо министрлигинин статс-катчысы Калысбек Шадыканов брифингде маалымдады.
Анын айтымында, гуманитардык жардамдарды ырааттуу бөлүштүрүү үчүн атайын комиссия түзүлгөн. Ал тууралуу бардык маалыматтар министрликтин www.med.kg сайтына жайгаштырылган.
Коронавирус менен күрөшүүгө Азербайжан, Кытай, Түркия, Катар, Бириккен Араб Эмирлиги, Түштүк Корея, Швейцария, Иран, Өзбекстан, Россия, АКШ өлкөлөрү көмөктөшкөн. Мындан сырткары, жергиликтүү жана эл аралык 65 уюм колдоо көрсөткөн. Алардын арасында БУУ системасындагы уюмдар, ПРООН, ТIKA, "Алибаба" "Алтын Кен" жана "Нурлуу Кайрымдуу кыздар" коомдук фонду бар. Ошондой эле чет жакта иштеп жүргөн кыргызстандыктардан дагы жардам келип жатканы айтылды.
Россия Кыргызстанга COVID менен күрөшүүгө кандай жардамдарды көрсөткөнү айтылды
Алар 25 аталыштагы медициналык жабдууларды, буюмдарды жана дары-дармектерди беришкен.
- Өпкөнү жасалма дем алдыруучу аппарат — 149;
- Кычкылтек концентратору — 322;
- Пульсоксиметр — 225;
- Байланышсыз термометр — 3353;
- Портативдик тепловизор — 86;
- Коргоочу комбинезон — 138 403;
- Экспресс-тест — 146 000;
- ПЦР-анализ үчүн топтомдор — 20 000;
- Респиратор — 293 092;
- Бет кап — 1 000 000;
- Кол кап — 850 132;
- Антисептик — 54 813 литр;
- Бахила — 208 099;
- Спирт 1000 мл — 19 998;
- Коргоочу көз айнек — 52 171;
- Халат — 65 624;
- Коронавирусту аныктоо үчүн топтомдор — 22 681;
- Дезинфекциялоочу каражаттар — 2 215 литр;
- Ооруканага керебет — 400;
- Керебеттин жанына коюлуучу монитор — 10;
- Шейшеп комплекти — 990;
- ИВЛ аппараттарына шаймандар — 20;
- Инъекциялык шприц — 2 731 200;
- Бетке арналган калканча — 53 073;
- Дары каражаттары — 13 286.
Шадыканов бул жардамдар баа жеткис экенин жана өз убагында келгенин белгилеп, ыраазычылык билдирди.
Белгилей кетсек, буга чейин вице-премьер Эркин Асрандиев Кыргызстан жалпы баасы 8 миллион долларлык гуманитардык жардам алганын айткан.
