БИШКЕК, 5-июл. — Sputnik. Москвадан кыргызстандык ыктыярчы дарыгерлер Бишкеке келип конгонун Тышкы иштер министрлигинин маалымат кызматы билдирди.
Ага ылайык, "Аэрофлот — Россия аба жолдору" компаниясынын Москва — Бишкек каттамы менен 424 кыргызстандык келди. КРдин Москвадагы элчилиги буга чейин өлкөгө бара турчу медиктердин саны 26 экенин айткан.
"Мекенге кайтып келүүнү каалагандардын саны көп болду. Ошондуктан элчиликтин, кыргыз диаспораларынын жана Москвадагы кыргызстандыктардын клиникаларынын өкүлдөрүнөн турган атайын комиссия кайтуусу зарыл адамдардын тизмесин даярдады. Ага студенттер, кош бойлуулар, оорулуулар жана оор жагдайга кептелгендер кирген. Ошондой эле азыркы кырдаалга кол сунууга келген кыргызстандык медиктер бар", — деп айтылат маалыматта.
Дарыгерлердин бири Нурлис Токебаевдин Sputnik агенттигине билдиришинче, бүгүн Саламаттык сактоо министрлигинде жыйын өтүп, анда жумуш бөлүштүрүлөт.
Дарыгерлер өлкөдө медицина кызматкерлеринин жетишсиздигинен улам жардам берүү үчүн учуп келишти. Ошондой эле Москвадагы мигранттар демилге көтөрүп, эки миллион рублдан ашык каражат топтогон. Буга алар кычкылтек концентратору менен дары-дармектерди алып берип жиберишкен.
ТИМ сыртта калып калган мекендештерди кайтаруу иши уланып жатканын белгиледи.
