БИШКЕК, 4-июл. — Sputnik. Вице-премьер Акрам Мадумаров фармацевтикалык компания өкүлдөрү менен жолугушту. Бул туурасында өкмөттүн маалымат кызматы кабарлады.
Мадумаров дары-дармектерди жана медициналык жабдууларды калк үчүн жеткиликтүү баада үзгүлтүксүз камсыздап берүү жаатында көмөк көрсөтүүнү сунуштаганы айтылат.
Ал эми өкмөт процедураларды жөнөкөйлөштүрүүдө, ошондой эле тийиштүү дары-дармектерди сатып алууда компаниялар менен түз келишимдерди түзүү маселесинде көмөк көрсөтүү милдеттенмесин алган.
Пандемияда кымбаттаган дарылар: чыга элек токтом, алакан жайган аптека ээси
Фармацевтикалык компания өкүлдөрү дары-дармектерди сертификациялоо процедурасы, дары-дармек каражаттарын киргизүү эрежелери, фискалдык жана укук коргоо органдары тараптан текшерүүлөрдүн санын азайтуу сыяктуу бир катар сунуштарды билдиришкен.
Вице-премьер бардык айтылган сунуштар Республикалык ыкчам штабдын кароосуна киргизилерин убадалаган. Ошону менен бирген фармацевтикалык компанияларды өлкө кыйын кырдаалда турганда биргеликте иш алып барууга чакырганы айтылат.
Коронавирус боюнча кырдаал
Өлкө боюнча COVID илештирип алгандардын жалпы саны 7094. Анын 2714ү айыгып, тилекке каршы, 78 киши көз жумду.
Ноокаттык медиктер кан куюп COVID-19дан айыктырышууда. Дарыгер Марипов менен маек
Ал эми Коронавирустун кесепетинен келип чыккан пневмония оорусуна март айынан бери 3009 адам чалдыкты. Бүгүнкү күндө анын 736сы айыгып чыкты. Ал эми 496 адамдын абалы оор, 153 бейтап жандандыруу бөлүмүндө жатат.
Өлкө аймагындагы соңку кабарлар менен биздин Telegram-каналдан таанышып туруңуз.
