БИШКЕК, 28-май — Sputnik. Пандемия башталгандан бери дүйнөдө көпчүлүк ишканалар кызматкерлерин аралыктан иштетип жатат. Ал тургай кийинки учурда COVID-19 бүткөндөн кийин дагы басымдуу бөлүгү үйдөн иштөөсүн улантат деген пикирлер айтылууда. Бул боюнча ВВС бир нече тараптын пикирин угуп көрдү.
Улуу Британиядагы Barclays деп аталган ири банктын жетекчиси Морган Стенли кызматкерлеринин көбүн аралыктан иштетүүнү пландап жатат. Айтымында, кеңседеги алардан бошогон эмеректи 35 миллион фунтка сатып ийсе болот. Ошол эле акчаны кайра кызматкерлерге жумшаса, иштин жыйынтыгы азыркыдан дагы жемиштүү болот деп эсептейт.
Дароо эле аралыктан иштөөгө кеңсе кызматкерлери кандай пикирде деген суроо жаралат. Лондондогу бизнес-мектептин кызматкери, профессор Андре Спайсер үйдөн иштөө боюнча дагы бир беткей пикирлер жок экенин айтат.
“Мисалы, айрымдарга үйдөн иштөө татаал, анын бир нече себеби бар. Кээ бирөөлөр жакшынакай кийинип, көчөгө чыгып, эл менен сүйлөшкөндү жакшы көрөт. Кесиптештер менен жүз көрүшүп, тамашалашкандан ырахат алат. Айрымдар тар үйдөн, эртеден-кечке бир же бир нече адамды карап отура бергенден тажайт. Буларга кеңседе иштеген баалуу жана маанилүү”, — деди Спайсер.
Анткен менен өтө чоң шаарда жашап, жумушка барып-келүүгө көп убакыт короткон, шаардын кымгуут жашоосун жаман көргөн адамдарга үйдөн иштөөдөн өтөрү жок экенин да айтышууда.
Андыктан адистер бардык нерсени убакыт өз ордуна коёрунан шек санабайт.
