БИШКЕК, 25-апр. — Sputnik. Коронавирусту алдын алуу үчүн жеке коргонуу каражаттарын (ЖКК) кайсы жакта иштеген медиктер кийиши керектигин саламаттык сактоо министри Сабиржан Абдикаримов брифинг учурунда айтып берди.
Ага журналисттер "Кыргызстанда вирус чыккандан бери жеке коргонуу каражаттарынын жетишсиздиги айтылып келет. Аны кимдер кийиши керек?" деген суроо узатышкан.
Министр ЖККны таратуу үч бөлүккө бөлүнгөнүн билдирди.
"Биринчи кезекте жугуштуу оорулар менен байланышта болгон дарыгерлер, медайымдар, санитарлар жана вирусологиялык лабораторияда иштегендер киет. Алар атайын бет каптар менен комбинезонду кийишет. Экинчи учурда обсервацияда тургандарга, чек арадагыларга берилет. Үчүнчү орунда мобилдик бригадалар. Алардын кайсы дарыгер эмне кийиши керек деген өзүнүн стандарттары бар. Бүгүнкү күндө жеке коргонуу каражаттары жетиштүү. Оорунун очогунда иштегендерди үзгүлтүксүз камсыздап турууга аракет кылабыз", — деди министр.
Брифингдин алып баруучусу "поликлиникада иштегендер дагы мындай каражаттардын жоктугуна нааразы болуп келишет" деген толуктоосуна министр "аларга кооптонууга негиз жок" деп жооп берген.
Өлкөдө учурда абал кандай болуп жатканын Sputnik Кыргызстан агенттиги жүргүзгөн тексттик трансляциядан билүүгө болот.
Sputnik Кыргызстан агенттиги карантин учурунда ар тараптан жардам бере турган кызматтардын ишеним телефондорун жана облустардагы комендатура, штабдардын номерлерин жарыялаган.
Кабарларды ыкчам, ыңгайлуу шартта окуу үчүн Telegram-каналыбызга баш багыңыз.
