БИШКЕК, 24-апр. — Sputnik. Дүйнөлүк саламаттык сактоо уюму Россияда чыгарылган вакциналарды коронавируска каршы колдонулуучу препараттардын келечектүү тизмесине киргизди. Бул тууралуу Россиянын ыкчам штабынын стопкоронавирус.рф. сайтына жарыяланды.
Аталган тизмеге кирген дарылардын алты түрү Новосибирскидеги "Вектор" вирусология жана биотехника мамлекеттик борборунда чыгарылган.
Федералдык мамлекеттик бюджеттик илимий мекеменин "Эксперименталдык медицина институту" менен биргеликте иштеп чыккан "Биокад" компаниясынын эки вакцинасы жактырылган.
Ал эми Санкт-Петербург илим-изилдөө институтунун адистери чыгарган бир вакцина тизмеге киргени айтылат.
Дүйнөлүк саламаттыкты сактоо уюму 11-мартта коронавирус инфекциясын пандемия деп жарыялаган. Жонс Хопкинс университетинин маалыматы боюнча, дүйнө жүзүндө COVID-19 жуктурган адамдардын саны 2,71 миллионго жетип, 190,8 миңден ашуун адам каза болду.
