БИШКЕК, 19-мар. — Sputnik. Калкты жана турак жай фондун каттоо бир айга жылдырылды. Бул туурасында мамлекет башчы Сооронбай Жээнбековдун коронавирус боюнча өткөргөн жыйынында айтылганын президенттин маалымат кызматы кабарлады.
Кечээ Жээнбеков Жогорку Кеңештин төрагасы Дастан Жумабеков, премьер-министр Мухаммедкалый Абылгазиев жана парламенттин фракция жетекчилери менен абалды сүйлөшкөн.
"Депутаттар менен жолугушууда калкты жана турак жай фондун каттоо бир айга кеч, тагыраак айтканда, 2020-жылдын 23-апрелинен 1-майына чейин өтөрү айтылды", — деп кабарлады маалымат кызматы.
Эске салсак, Статистикалык комитеттин кызматкерлери каттоо иштерин ушул жылдын 23-мартынан 1-апрелине чейин жүргүзмөк. Бирок Кыргызстандагы эпидемиологиялык кырдаалга байланыштуу эл каттоонун мөөнөтү жылдырылары айтылып, датасы такталган эмес.
Эске салсак, Кыргызстанда кечээ, 18-мартта, коронавирус биринчи жолу үч адамга жукканы аныкталды. Жарандардын бардыгы Жалал-Абад облусуна караштуу Сузак районунун тургундары. Алар Сауд Аравиядан кичи ажылыктан келген.
Сузак районуна болсо өзгөчө кырдаал киргизилген.
Кыргызстанда учурда коронавируска байланыштуу абал кандай болуп жатканын Sputnik Кыргызстан агенттигинин тексттик трансляциясынан биле аласыздар.
