Депутат: кырылып калабыз, Италиядан келген эки кишини карантинге албай коюшту

БИШКЕК, 27-фев. — Sputnik. Жогорку Кеңештин депутаты Жыргалбек Турускулов Италиядан калген жарандарды карантинге киргизбей коё берип жатканын айтып, нааразы болду.

Белгилей кетсек, коронавирус илдети Италияда дагы жайылганына байланыштуу Кыргызстан аталган өлкөдөн келгендерге карантиндик тартип киргизген.

Депутаттын айтымында, ал талаптар аткарылбай, тескерисинче, келген жарандар өздөрү суранып ооруканага барса кабыл албай жатат.

"Кечээ вице-премьер Алтынай Өмүрбекова, саламаттык сактоо министри келип "коронавирус жайылган өлкөлөрдөн келгендерди ооруканага жаткырып үч күн текшеребиз" деп айтышкан. Эгер белгилери аныкталса, 14 күн кармаларын билдиришкен. Эми мен бир факт айтайын. Бүгүн эртең менен Италиядан эки кыргыз жараны Бишкекке келди. Тилекке каршы, аэропорттон тепловизор менен текшерип эле жөнөтүп ийишиптир. Туугандары жугуштуу оорулар ооруканасына алып барса, ары-бери чуркатып, дене табын текшерип кайра жөнөтүптүр. Эгерде ушундай шалаакылык кылышса кырылып калабыз да, туурабы? Урматтуу төрага, буга чара көрөлү. Байкуштар өзүлөрү "мени 14 күн жаткырып койгулачы" деп суранып жүрөт. Бул эмне деген шумдук?!" — деди Турускулов.

Парламенттик жыйынга катышып жаткан биринчи вице-премьер Кубатбек Боронов бул маселени териштире турганын билдирди.

Белгилей кетсек, Кыргызстан коронавиурс күч алган Кытай, Түштүк Корея, Иран, Италия жана Япониядан келгендерге карантиндик тартип киргизген. Өкмөт бул өлкөлөрдөн келген жарандар 14 күн бою атайын жайларда болушарын кабарлаган болчу.