БИШКЕК, 19-фев. — Sputnik. Быйыл ажылыкка барчу зыяратчылардын кийимин Айкөл Аликжанова тигет. Бул тууралуу муфтияттын тараткан маалыматында айтылат.
Белгилей кетсек, Аликжанова "Кыргызстан сулуусу — 2014" сынагынын жеңүүчүсү.
Маалыматка ылайык, зыяратчылардын кийимин тигүүчү тараптар ортосунда өткөн конкурска 13 талапкер катышкан.
Конкурстун жүрүшүндө ажылыкты уюштуруу боюнча республикалык штабдын мүчөлөрү ажылардын кийиминин тигилишине коюлган наркка, кездеменин курамына жана сапаттуулугуна, дизайнына, өңү-түсүнө, коопсуздук белгилерине, ыңгайлуулугу боюнча коюлган талаптарга бааларын беришкен.
"Ажылардын кийимин тигүүчүлөр ортосунда өткөн конкурста бардык талапка жооп бергендиги боюнча ажылыкты уюштуруу штабынын мүчөлөрү Айкөл Аликжанованы татыктуу деп табышты. Эми ага 2019-жылдагы ажылыктын формасын тигүү милдети жүктөлдү", — деп айтылат маалыматта.
Актриса, модель, "Кыргызстан сулуусу-2014" жана "Интернет KG сулуусу-2012" наамдарынын жеңүүчүсү Айкөл Аликжанова 2016-жылы мындан ары хиджаб кие турганын билдирген.
