БИШКЕК, 18-фев. — Sputnik. Интернетте тараган видеодогу жумуртка эмне себептен резинадай чоюлуп каларын жана товар кайдан келиши мүмкүн экенин Sputnik Кыргызстан агенттигине КРдин Канаттууларды багуучулардын ассоциациясынын төрагасы Рустам Осмоналиев айтып берди.
Эске салсак, 17-февраль күнү социалдык тармактарда өзүн Ош шаарынын тургунумун деп тааныштарган адам жумуртканын сарысы резинадай чоюлуп жатканын көрсөтүп берген видео тараган.
Кадрда сүйлөп жаткан адам жумуртканы базардан сатып алганын айтат.
Осмоналиевдин кебине караганда, түштүктө буга чейин эле сапаты күмөн жараткан жумурткалар сатылып жатканы тууралуу айтып, ассоциацияга кайрылгандар болгон.
"Ошондон кийин түштүккө адистерди жибергенбиз. Бул жумурткалар Өзбекстандын аймагынан киргизилип жатканы белгилүү болгон. Бажыдан жумуртканы жөө ташып кирип иштегендер 45 мүнөттүн ичинде 75 миң жумуртка көтөрүп кирет деген маалымат бар. Бул тууралуу кыргыз өкмөтүнө кайрылганбыз", — деди Осмоналиев.
Адистин пикиринде, жумурткалардын чоюлчак болуп калышынын эки себеби бар.
"Биринчиси — товар узак убакыт бою, тагыраагы, 6 айдын тегерегинде тоңдуруучу камерада сакталса ушундай болуп калышы ыктымал. Экинчи божомол булар Кытай же Өзбекстандын аймагында чыккан жасалма товар болушу мүмкүн", — деди ассоциация жетекчиси.
Маалыматка караганда, учурда Кыргызстан өзүн жумуртка менен 50 пайызга гана камсыздай алат.
