БИШКЕК, 1-фев. — Sputnik. Кыргызстандык ажыларды Меккеге Flaynas авиакомпаниясы былтыркы баа — 1550 доллар менен ташый турган болду. Бул туурасында муфтияттын маалымат кызматынан кабарлашты.
"31-январда Кыргызстан мусулмандарынын дин башкармалыгынын жыйындар залында 2019-жылдагы ажыларды ташуучу тараптардын сынагы өттү. Ага жалгыз гана Сауд Аравиясынын жарандык Flaynas авиакомпаниясы катышты", — деп айтылат таратылган маалыматта.
Flaynas талаптарда көрсөтүлгөн тиешелүү документтерин сунуштап, эки тараптуу талкуунун жүрүшүндө кыргызстандыктарды ташуунун наркы 1550 доллар бойдон калган.
"300 орундуу Boeing 767–300 учагы алгач Сауд Араб Падышалыгынан Кыргызстанга бош учуп келет дагы 300 зыяратчыны Мекке шаарына алып барат. Ажылык сапары бүткөндөн кийин алар 300 ажыны Кыргызстанга алып келет дагы бош учуп кетет. Бул түз чартердик рейс болгондуктан 4 рейстин экөө бош учуп келет. Ошондуктан коюлган бул баанын ичинде барып-келүү чыгымдары жана төлөмдөрдүн бардыгы кошо эсептелинген", — деди Flaynas авиакомпаниясынын Кыргызстандагы өкүлү Таалайбек Окенов.
Эскерте кетсек, былтыр кыргызстандык зыяратчылардын алгачкы тобу 25-июлда Бишкек — Медина багыты боюнча учуп кеткен.
