БИШКЕК, 1-авг. — Sputnik. Жогорку Кеңештин мурдагы депутаты Өмүрбек Текебаев №47 түзөтүү колониясынан Мирсаид Миррахимов атындагы улуттук кардиология борборуна 31-июлда которулду. Бул тууралуу Жаза аткаруу мамлекеттик кызматынын маалымат катчысы Элеонора Сабатарова Sputnik Кыргызстан агенттигине билдирди.
Анын айтымында, Текебаев ден соолугу начарлап кеткенинен которулган эмес.
"Дарыгерлердин сунушу менен ооруканага кечээ, 31-июлда, которулду. Бул анын ден соолугу начарлап кеткенине байланыштуу эмес. Ал пландуу текшерүү үчүн гана жаткырылды. Буга чейин депутаттардын тобу "Текебаевди текшерүүгө алып барбай жатышат" деп айтып келишкен. Биздин жетекчилик Саламаттык сактоо министрлигине текшерүүдөн өткөрүп бергиле деп кайрылган. Консилиум өттү. Текебаев текшерүү аяктаганга чейин кайтарууда болот. Текшерүү качан аяктарын так айта албайбыз", — деди Сабатарова.
Ал ошондой эле Текебаев ооруканадан чыккандан кийин консилиумда көрсөтүлгөн сунуштар боюнча дарылануусун уланта берерин кошумчалады.
Жогорку Кеңештин экс-депутаты Өмүрбек Текебаев Кылмыш жаза кодексинин коррупция жана алдамчылык беренелери боюнча айыпталып, 8 жылга эркинен ажыратылган.
