Гимназияда эмес, айылдын мектебинде окуп деле бийиктикти багынтса болорун далилдеген кыздардын алды Толкун Жеткинбекова менен Sputnik Кыргызстан агенттигинин кабарчысы маектешти. Бүтүрүүчү окуудагы ийгиликтери жана алтын сертификат алуунун сыры менен бөлүштү.
— Айылдын мектебинде окуп жүрүп алтын сертификатка илинүү оңой эмес болсо керек. Жалпы республикалык тестирлөөгө канча убакыт даярдандыңыз?
— 10-класстан баштап атайын тестирлөөгө карап SECOM билим берүү мекемесине барып бир жыл окуп келгем. Андан сырткары, Нарын облусунун мугалимдери менен тандоо сабактарыма (химия, биология, англис тилинен) даярдандым. Ошентип ЖРТга эки жыл мурун эле камына баштагам.
— Анда алтын сертификат алам деп өзүңүзгө ишенген турбайсызбы?
— Даярдангандыкыбы, айтор, тестирлөөгө киргенде аябай деле корккон жокмун, мен буга чейин иштеп жүргөн көнүгүүлөргө окшош болду. Киргенде да өзүмө 200дөн ашам деп сөз бергем, бирок алтын сертификат алам деген ой болгон эмес. Апам эле "сен алтын сертификат аласың" деп аябай күткөн. Ата-энемдин үмүтү акталды деп ойлойм.
— Мектепти да артыкчылык менен бүтсөңүз керек?
— Азыр жаштардын көбү убактысын интернет менен өткөрүп калбадыбы. Facebook, Instagram социалдык түйүндөрдө отурасызбы?
— WhatsApp тиркемесинен башка телефонумда бир дагы тиркеме жок. Социалдык тармактарга катталган эмесмин.
— Сабактан тышкаркы бош убактыңызды эмне кылып өткөрчү элеңиз?
— Телефон, интернет мени башында эле кызыктырган эмес. Бош убактым деле болгон жок, себеби сабактан сырткары комуз ийримине, англис тил курсуна барчумун. Менин оюмча убакытты туура пайдалана билишти үйрөнүп, өзүңө жаккан нерсени жасаш керек. Бош убактым болсо эле китеп окуйм. Китеп мен үчүн дайыма алдыга жетелеген, өзүңдү туура алып жүрүүгө, акылды да, жүрөктү башкарууга жардам берип, руханий байлык тартуулаган жардамчы болуп эсептелет.
— Айыл жеринде жумуш көп эмеспи. Ата-энесине жардам берем деп кээ бир балдар окуудан оолак болуп калышат…
— Ата-энем менин окуп гана отурушума жакшы шарттарды түзүп берди. Жумуш деле жасатышчу эмес. Апам башталгыч класстардын мугалими болгондуктан "сенден бир нерсе чыгат, оку" деп эле турчу.
— Үй-бүлөңүз тууралуу да азыноолак кеп кыла кетсеңиз?
— Атам жеке ишкер, апам башталгыч класстын мугалими. Мени 4-класска чейин апам өзү окутту. Беш бир туугандын төртүнчүсүмүн. Байкем, эки эжем жана иним бар. Эжелерим да окууну жакшы бүтүп, Германиядан билим алышкан.
— Алтын сертификат менен окуу жайдын баарынын эшиги ачылыптыр. Кайсы кесипти тандайын деп турасыз?
— Кичинекейимен бери дарыгер болууну самачумун. Мурда окуп жүргөндө жазган дил баяндарымды чогултуп койгом. Карасам баарына эле "дарыгер болом" деп жаза берчү экенмин. Буюрса, шаарга барганда бардык университеттерди карап көрүп дарыгерлик кесипке тапшырам. Анын ичинен балдар дарыгери болгум келет.
— Айылдагы мектептен эле алтын сертификат алса болорун далилдеп жатасыңар. Жогорку балл алам деген окуучуларга кандай кеп-кеңеш берет элеңер?
— Эң негизгиси убакытты туура пайдаланып, өзүнө ишениш керек. Көрсө айылдан деле алтын сертификат алса болот экен. Көп изденип, окуп, мугалим жактан да, окуучу өзү тараптан да жакшы аракеттер көрүлсө эле ийгилик сөзсүз жылмаят. Башында чын элеби деп ишенбей жатканбыз, көрсө баары адамдын өзүнүн аракетинен экен.
— Дагы кандай план, кыялдарыңыз бар?
— Азырынча жакшы окуу жайга өтүп алсам деп ойлоп жатам. Андан сырткары, өзүм ырдаганды жакшы көрөм. Ат-Башы районундагы Жумамүдүн Шералиев атындагы музыкалык мектебинде да билим алгам. Мындан улам кийин окууга тапшыргандан кийин чыгармачыл өнөрүмдү да байкап көрсөм деген тилек бар.
