БИШКЕК, 4-мар. — Sputnik. Социалдык тармактардын колдонуучулары кол чатыр көтөргөн Сооронбай Жээнбековдун сүрөтүн талкуулап жатышат.
Интернет колдонуучулардын айрымдары "президент муну менен жөнөкөйлүгүн көрсөттү, айылда эле чоңойгон кыргыздын баласы" десе, кээ бирлери "мында таң кала турган эч нерсе деле жок" деп комментарий беришүүдө. Ал эми үчүнчүлөр Россиянын президенти Владимир Путин өткөн жылдын июнь айында Белгисиз солдаттын күмбөзүнө гүлчамбар кою учурунда нөшөрлөп жамгыр жааганына карабастан кол чатырсыз турганын мисал келтиришүүдө.
Бүгүн Сооронбай Жээнбековдун президенттигине 100 күн толду. Аталган сүрөт бул датага карата Султан Досалиев жүктөгөн сүрөттөрдүн бири гана болуп эсептелет.
Кол чатыр көтөргөн чиновниктер калаанын мурдагы прокурору Нурлан Сулайманкулов менен байланышкан окуядан кийин элдин көңүлүн бура баштаган. Социалдык тармактарга анын жардамчысы аркасында кол чатыр көтөрүп турган сүрөт тарап кеткен. Айрымдар Сулайманкуловду "бай манап" деп жемелешкен.
