Окумуштуулар чөнтөк телефондун жанында уктоонун зыяндарын айтып беришти

БИШКЕК, 19-дек. — Sputnik. Калифорниядагы Саламаттыкты сактоо департаменти чөнтөк телефондорду көп колдонуу ракка, тукумсуздукка андан башка дагы бир топ олуттуу ооруларга кабылтышы мүмкүндүгүн эскертти. Окумуштуулар андан сырткары, гаджетти уктаганда керебеттин жанында калтырбоо керектигин айтышты. Бул туурасында РИА Новости ведомствонун сайтына шилтеме кылып кабарлады. 

Документте бөлүп чыгарылган нурлар адамдын эс-тутумуна, угуусуна жана түш көрүүсүнө терс таасирин тийгизери белгиленген. Андан сырткары, башты оорутуп, тукумсуздук менен онкологиялык илдеттерге кабылтышы мүмкүндүгү айтылган.

Смартфондорду көп колдонуу балдар менен өспүрүмдөр үчүн артыкча кооптуу экендигине өзгөчө басым жасалды. Себеби, радиожыштыктын кубаты өсүп келе жаткан организмге таасирин тийгизип, алардын мүнөзү да бузула баштайт. Аны кулакка кечке кармоо угууну начарлатып эле тим болбостон, дүлөй болуп калуу кооптуулуугун жаратары да айтылган.

Андыктан, докладдын авторлору чөнтөк телефон менен сүйлөшүп жатканда кулакчынды колдонууну сунуштайт. Буга кошумча телефонго интернеттен кайсы бир маалыматтарды көчүрүп же өткөрүүдө жана уктап жатканда аны алысыраак кармоону эскертишкен.