БИШКЕК, 15-окт. — Sputnik. Бюллетенди аймактык шайлоо участкасынан алып чыгууга аракет кылган аял кармалганын Боршайкомдун маалымат кызматы билдирди.
Ага ылайык, координациялык топко Ош облусунун Кара-Кулжа районундагы №5009 аймактык шайлоо участкасынан жергиликтүү тургундун бюллетенди сыртка алып чыкканы тууралуу маалымат түшкөн. Бул видеого тартылып калган.
Аталган факты боюнча милиция ыкчам чара көрүп, аялды кармашкан.
"Ал чагымчылдык максатта бюллетенди автоматтык урнага салбай сыртка алып чыккан", — деп айтылат маалыматта.
Андан сырткары, кармалган аял мындай кадамын ага аймактык шайлоо комиссиясынын мүчөлөрү талапкерлердин бирине добуш берүүдө тоскоолдук кылганы үчүн жооп иретинде жасаганын айткан.
Материалдар топтолуп чара көрүү үчүн укук коргоо органдарына тапшырылды.
Белгилей кетсек, бүгүн Кыргызстанда президенттик шайлоо өтүп жатат.
