БИШКЕК, 15-окт. — Sputnik. Токмокто белгисиз адамдар шайлоону үзгүлтүккө учуратуу үчүн добуш берүү участокторун электр энергиясы менен камсыз кылган трансформаторлордун майын куюп алышкан. Бул тууралуу Sputnik Кыргызстан маалымат агенттигине жергиликтүү тургун кабарлады.
Анын айтымында, окуя 14-октябрда болгон.
"Белгисиз адамдар шайлоо участокторун электр энергиясы менен камсыз кылган трансформаторлордун майын куюп алган. Муну менен алар шайлоону үзгүлтүккө учуратууга аракет кылышкан", — деди ал.
Ал эми Чүй облустук ШИИБдин маалымат кызматы бул билдирүүнү четке кагып, мындай факты катталбаганын билдирди.
"Түндүкэлектр" ААКнын маалымат кызматы да бул кабарды төгүнгө чыгарды.
