БИШКЕК, 18-июн. — Sputnik. Өзгөн шаарындагы Салижан Шарипов атындагы мектептин төрт сменага бөлүнүп окуган окуучулары үчүн жаңы имарат салына баштады. Бул тууралуу Sputnik Кыргызстан агенттигинин кабарчысына Өзгөн шаарынын вице-мэри Мухаммед Макешов билдирди.
Жаңы имарат 100 орунга ылайыкташтырылган, 2017-жылдын 1-сентябрына колдонулууга берилмекчи.
"Бул мектеп 640 окуучуга ылайыкташып, 1968-жылы курулган. Учурда анда 2128 окуучу билим алууда. Бир орунга төрт бала туура келип, бир класста 40-45 окуучу бар. Акыркы 10 жылдан бери окуучулар 4 сменада окушат. Ошондо төртүнчү сменада окуган окуучулар 20:00гө чейин окууга аргасыз", — деди Макешов.
Анын айтымында, 100 орундуу жаңы мектепти куруу үчүн каражат шаардык казынадан бөлүндү.
Өзгөн шаарында жалпысынан сегиз орто мектеп бар. Анын төртөөндө окутуу жалаң өзбек тилинде болсо, калган төрт мектеп кыргыз, өзбек жана орус тилдеринде окутат.
