БИШКЕК, 18-мар. — Sputnik. Жөө жүрүш маалында беш киши коомдук тартипти бузуп, жол кыймылына тоскоолдук жаратканы үчүн кармалганын шаардык ички иштер башкармалыгынын маалымат кызматы билдирди.
Эскерте кетсек, бүгүн, 18-март күнү, саат 10.00дө сөз эркиндигин сактоо талабы менен жөө жүрүш өтүп, ага депутаттар, коомдук ишмерлер, саясатчылар жана активисттер катышкан.
"Бөкөнбаев менен Байтик баатыр көчөлөрүнүн кесилишинен акциянын айрым катышуучулары милиция кызматкерлеринин эскертүүлөрүнө карабай коомдук тартипти бузуп, унаа кыймылына жолтоо болушкан. Беш киши Свердлов РИИБине алып келинди", — деп айтылат билдирүүдө.
Эскерте кетсек, 1-мартта Жогорку Кеңештеги "Ата Мекен" фракциясынын лидери Өмүрбек Текебаевдин адвокаттары эл өкүлүнө таянып, маалымат жыйында 16-январда Бишкекке кулаган учактагы жүк Алмазбек Атамбаевге таандык экендигин айтышкан. Жыйынтыгында Башкы прокуратура Таалайгүл Токтакуновага, Канатбек Азизге жана "Азаттык", Zanoza, "24.kg" маалымат агенттиктеринин үстүнөн арыз менен сотко кайрылган.
