БИШКЕК, 13-мар. — Sputnik. Кыргызстандагы бийик чокулардын бирине "Апрель революциясынын баатырлары" деген географиялык аталышты ыйгаруу жөнүндө мыйзам долбоору коомдук талкууга коюлду. Бул тууралуу Жогорку Кеңештин сайтында жазылган.
Маалыматка караганда, мындай аталышты Ысык-Көл облусунун Ак-Суу районунун аймагындагы Тескей Ала-Тоо кыркасында жайгашкан 4142,2 метр бийиктиктеги чокуга берүү сунушталган.
Демилге Ак-Суу районунун Челпек айылдык кеңешинин чечими боюнча көтөрүлүп, райондун администрациясы токтомду кабыл алган.
Өкмөттүн Ысык-Көл облусундагы ыйгарым укуктуу өкүлү да бул идеяны колдогон. Эми Маданият, маалымат жана туризм министри Түгөлбай Казаков бул мыйзам долбоору боюнча Жогорку Кеңеште доклад жасаганы жатат.
