БИШКЕК, 2-мар. — Sputnik. Бишкек мэриясы менен Кайгуул милициясы биргеликте шаардагы базарлардын айланасын иретке келтирип жатканын муниципалитеттин маалымат кызматы билдирди.
Ага ылайык, Жибек Жолу проспектисиндеги Аламүдүн базарынын айланасында рейд уюштурулган.
"Тыюу салынган жол белгилерине карабастан маршруттук таксинин айдоочулары жол эрежесин одоно бузуп, машиналарын токтотуп, жол кыймылына тоскоолдук кылууда. Кайгуул милициясы административдик протокол түзө баштаганда ага нааразы болгон айдоочулар көбөйгөн. Кыска убакыттын ичинде он протокол түзүлдү, — деп айтылат маалыматта.
Ушундай эле рейд "Ак-Эмир" базарынын айланасында жүргүзүлүп, эреже бузган айдоочуларга карата 12 протокол түзүлгөн.
Мэрия тараткан билдирүүдө мындай рейддер эми такай уюштурулары айтылат.
