БИШКЕК, 11-мар. — Sputnik. Бишкек шаардык сотто бүгүн Жогорку Кеңештин мурдагы спикери Ахматбек Келдибековдун иши каралып, анда фемида өкүлдөрү соттолуучуга 10 миллион сом айып салды.
Келдибековго карата ЖКнын Москвадагы өкүлчүлүгүн ачууда кызматынан кыянаттык менен пайдаланган деген айып коюлуп, бул кадамы үчүн беш миллон сом жана 2008-2009-жылдары КРдин Салык жана жыйымдар боюнча мамлекеттик комитетинин төрагасы болуп турганда "Бизнес партнер" ишканасына мыйзамсыз түрдө патент берүү укугун ыйгарган деп күнөөлөнүп, ал үчүн беш миллион сом айыпка жыккан. Кылмыш жаза кодексиндеги талапты эске алуу менен, сот өкүлдөрү Келдибековго карата жалпы жонунан 10 миллион сом айып салды.
Эске сала кетсек, 10-мартта сот отуруму болуп, тараптардын жарыш сөзгө чыккан. Анда мамлекеттик айыптоочу Келдибековду мүлкүн конфискациялоо менен катуу режимде 10 жылга эркинен ажыратууну суранган.
Өз кезегинде Келдибековдун адвокаттары анын эч кандай күнөөсү далилденбегенин айтып, актоону суранышкан.
Эскерте кетсек, Келдибеков 2002-2005-жылдары Социалдык фонддун төрагасы болуп турганда жана 2008-2009-жылдары Салык кызматын башкарган убагында коррупцияга барган жана ЖКнын спикери кезинде кызматтык абалынан кыянаттык менен пайдаланган деп айыпталууда.
Ага Кылмыш жаза кодексинин 30-беренесинин төртүнчү бөлүгү (кылмышка шериктеш болуу), 303-беренесинин биринчи бөлүгү (коррупция), 304-беренесинин төртүнчү бөлүгү (кызматтык абалынан кыянаттык менен пайдалануу) боюнча кылмыш иши козголгон.
Келдибеков жогорудагы айыптар менен 2013-жылы камакка алынган. Бишкек шаарынын Биринчи май райондук соту Келдибековду коррупция беренеси боюнча актап, ал эми Москвадагы өкүлчүлүктү ачуу боюнча үч миллион сом айып пул салган.
