БИШКЕК, 3-фев. — Sputnik. Жогорку Кеңештин депутаттары Москвадагы өрттөн каза болгондордун жакындарына бир күндүк айлык акысын которуп берет. Мындай чечим парламенттин жыйынында кабыл алынды.
Жогорку Кеңештин төрагасы Асылбек Жээнбеков, мындан тышкары, фонддон да каражат бөлүнөрүн кошумчалады.
Үстүбүздөгү жылдын 30-январында Москва шаарынын чыгыш аймагындагы Стромынка көчөсүндөгү өнөр жай имараттарынын биринен өрт чыгып, 3 миң чарчы метри күйүп кеткен. Натыйжада имараттын чатыры кулап, 12 адам каза тапкан. Анын сегизи Кыргызстандын жараны, экөө — Россиянын жарандыгын алган этникалык кыргыздар жана эки өзбекстандык жаран экени белгилүү болду.
Маркумдардын сөөгү тийиштүү экспертизалар өткөрүлгөндөн кийин Кыргызстанга алып келинери белгилүү болду.
