БИШКЕК, 24-янв. – Sputnik. Кыргызстанда мамлекеттик органдар иш-чараларды аткарып жатканда алардын ишинде формалдуулук байкалып, жасаган иштеринин майнабы болбой жатат. Бул туурасында Коопсуздук кеңешинин катчысы Дамир Сагынбаев айтты.
Жыйынды президент Сооронбай Жээнбеков ачып, Кеңештин аткарылган чечимдери боюнча докладды жасоо үчүн сөздү Сагынбаевге берди.
Ал мамлекеттик органдардын ишинде кетирилген кемчиликтер туурасында билдирүү жасады. Тагыраагы, кеп чечимдердин аткарылышынын мөөнөтү созулуп кеткендиги жөнүндө болду.
"Мамлекеттик органдар иш-чараларды аткарып жатканда алардын ишинде формалдуулук байкалып, жасаган иштеринин майнабы болбой жатат. "Санариптүү Кыргызстан" программасын ишке ашырууга багытталган комиссияны түзүү чаралары ишке ашкан жок. Бул долбоорду кармап жатат. Бардык эле мамлекеттик органдар "Түндүк" электрондук системасы боюнча өз ара иш алып барган жок", — деди Сагынбаев.
Сагынбаев убакыт аз болгондуктан бул жаатта бир нече гана фактыларды келтиргендигин билдирди. Ал кээ бир иш-чаралар убагында аткарылбай же анын турмушка ашырууда өзөгү бурмаланып кеткендигине токтолду.
Президент эмне деди?
Сооронбай Жээнбеков мамлекеттик органдардын жетекчилери аткара турган иштерин же толук билбейт, же аны аткарууда саботаж кылып жатат деген пикирин билдирди. Анын айтымына караганда, кээ бир учурларда бюрократия же үстүртөн жасалган мамиле байкалат.
"Мамлекеттик органдар бир катар долбоорлорду иштеп чыгуунун процесстерин, мөөнөтүн бекитүүнү, чечимдерди кабыл алууну создуктуруп жатат. Андан сырткары, чечим кабыл алынгандан кийин иш убактылуу же таптакыр эле токтоп калган учурлар бар", — деди Жээнбеков.
Жээнбеков аталган инспекциянын жетекчиси кармалган кызматкери менен жетекчисин бир айдан соң гана иштен кетиргенине жини келди. Президент ишин аткара албаган мамлекеттик органдын кызматкерлерине ишти алып бара албаса арызын жазып кете берүүсүн талап кылды.
