БИШКЕК, 14-ноя. — Sputnik. Мурдагы мэр Кубанычбек Кулматовдун атына берилген паспорттордун (ID жана жалпы жарандык паспорт) мыйзамдуулугун жокко чыгаруу боюнча соттук иш токтотулду. Бул тууралуу Sputnik Кыргызстан агенттигинин кабарчысына айыпталуучунун адвокаты Сергей Слесарев билдирди.
Анын айтымына караганда, Калкты жана жарандык абал актыларын каттоо департаменти доо арызын артка кайтаргандыгына байланыштуу сот ушундай чечим кабыл алды.
Адвокат ошондой эле департамент сотко берилген документтердин түп нускасын көрсөтө албай калышы дагы ыктымал экенин белгиледи.
"Алар россиялык документтерге шилтеме берип жатышкан, бирок ал документтердин аныктыгына тергөөчү гана кол койгон. Бирок тергөөчү документтердин аныктыгын аныктоочу тарап боло албайт", — деди юрист.
Кулматов коррупция беренеси боюнча да айыпталып, 18-майда кылмыш иши козголгон. Соттун чечими менен 5-июнда камакка алынган.
Укук коргоо органдарынын версиясы боюнча Кулматов Бишкек шаарынын мэри болуп турган кезде ТBEA компаниясы тарабынан эки мектептин курулушуна берилген 2 миллион долларды мыйзамсыз пайдаланган. Ага коррупциядан тышкары мыйзамсыз түрдө Россия жарандыгын алган деп да айып тагылган.
