БИШКЕК, 2-сен. — Sputnik. Түркиянын президенти Режеп Тайип Эрдоган Кыргызстанга болгон эки күндүк иш сапарынын алкагында КР президенти Сооронбай Жээнбеков менен тар жана кеңири чөйрөдө жолугуп, эки тараптуу кызматташуу тууралуу 12 документке кол койгондон кийин журналисттер үчүн маалымат жыйын өткөрдү.
Анда түрк президенти Эрдоган Кыргызстандагы ФЕТО (Фетхуллах Гүлендин террордук уюму – авт.) террордук уюмуна каршы күрөшүү боюнча да маселесин Сооронбай Жээнбеков менен чогуу талкуулаганын айтты.
Түрк президенти ошондой эле өз сөзүндө ФЕТОнун тарапташтары армияга, милицияга, мамлекеттик бийликтин бардык тарабына кирип алып, ошол жактан төңкөрүш жасоо аракеттерин баштай турганын баса белгиледи.
Андан сырткары, ФЕТО маселесин эки өлкөнүн күн тартибинен алып салуу менен келечекке карай бирге иш-аракеттерди көрүү керектигин айтты.
"Бул багыттан алганда биз "Маариф" фондусуна өзгөчө маани беребиз. Бул фондунун Кыргызстандын Билим берүү министрлиги менен бирге жасай турчу аракеттери ал жактагы маселени чечип, Кыргызстан үчүн пайдалуу болот деп ишенем", — деди Эрдоган.
Өз кезегинде президент Сооронбай Жээнбеков Режеп Тайип Эрдоган менен Анкарада жолукканда дагы бул маселе айтылганын белгилеп, бүгүн дагы тар чөйрөдө жолукканда бул маселе коюлганын кошумчалады.
КР президенти ошондой эле өлкө башчы катары бул иш өзүнүн түз көзөмөлүнө аларын айтып, Кыргызстанда иштеп жаткан бардык жарандар, КР мыйзамы менен иштей турганын жана ага мамлекет көз саларын билдирди.
