БИШКЕК, 6-июл. — Sputnik. Премьер-министр Мухаммедкалый Абылгазиев 6-7-июлда эки күндүк жумушчу сапары менен Ысык-Көл облусуна барат. Бул тууралуу өкмөттүн маалымат кызматы билдирди.
"Сапардын жүрүшүндө Дүйнөлүк көчмөндөр оюндарын өткөрүүгө даярдыгын текшерип, "Балыкчы — Корумду" унаа жолунун, Ысык-Көл районундагы альтернативалык "Семеновка — Григорьевка" унаа жолунун курулушун карап чыгат жана "Ысык-Көл" эл аралык аэропортунун ишмердиги менен таанышат", — деп айтылат маалыматта.
Андан сырткары, премьер-министр 2018-жылдагы жайкы туристтик мезгилди уюштуруу боюнча көчмө жумушчу кеңешме жана аймактарды өнүктүрүү жылынын алкагында иш-чараларды ишке ашыруу боюнча уюштуруу комитетинин жыйынын өткөрөт.
Өкмөт башчы ошондой эле Ак-Суу, Тоң, Жети-Өгүз райондору менен Каракол шаарында дагы болот.
