Жээнбеков сот Оморованы кызматтан алды. Ал мурда Zanoza.kg боюнча чечим чыгарган

БИШКЕК, 4-апр. — Sputnik. Президент Сооронбай Жээнбеков Сот кеңешинин Тартип комиссиясынын сунушунун негизинде Бишкек шаарынын Октябрь райондук сотунун судьясы Гулчехра Оморованы кызматтан алуу боюнча Жарлык чыгарды. Бул туурасында мамлекет башчынын маалымат кызматынан кабарлашты. 

Маалыматта Судьялар кеңешине караштуу Тартип комиссиясынын Октябрь райондук сотунун судьясы Оморованы ээлеген кызматынан мөөнөтүнөн мурда бошотуу түрүндө тартип жазасын колдонуу тууралуу сунушу берилгендиги айтылат. 

Андан сырткары, Конституциянын Судьялар статусу жөнүндө КРдин конституциялык мыйзамынын эки беренесинин негизинде Октябрь райондук сотунда иштеген Оморова КРдин жергиликтүү сотунун судьясынын кызматынан бошотулуп, судьялык ыйгарым укуктары мөөнөтүнөн мурда токтотулганы маалымдалган.

Сотту кызматынан Жарлык менен бошотууга эмне себеп болгону айтылган эмес. 

Эске салсак, Гулчехра Оморова Zanoza.kg сайтына жана анын түзүүчүлөрүнүн бири, автор Нарынбек Идиновго карата Башкы прокуратура берген доо арызы боюнча (Нарын Айып) сот ишти караган. Көзөмөл органынын жетекчиси Индира Жолдубаева Нарын Айыптын макаласы ал кездеги президент Алмазбек Атамбаевдин кадыр-баркына доо кетирди деп арыз менен кайрылган. Сот бир нече отурумдан соң журналистти 3 миллион сом төлөсүн деген чечим чыгарган. 

Бул Фемида өкүлү жогорудагы иштен сырткары депутат Дастан Бекешевдин коомдук активист Мавлян Аскарбековдун үстүнөн жазган арызы боюнча сот ишин карап, 2017-жылдын январында күнөөлүү деген чечим чыгарган. 

Буга чейин президент Сооронбай Жээнбеков Коопсуздук кеңешинин жыйынында мыйзамды одоно бузгон соттор сөзсүз түрдө жазага тартылышы керектигин билдирген.