00:54 24 Тогуздун айы 2017
Түз эфир
Шайлоо. Архивдик сүрөт

15-октябрда президент шайланбай калса эмне болот. Экинчи турдун жол-жобосу

© Sputnik / Табылды Кадырбеков
Саясат
Кыскача шилтеме алуу
Бегимай Бакашева
Кыргызстандагы президенттик шайлоо - 2017 (252)
2863 0 0

Президенттик шайлоонун экинчи туру биринчисинен эки жума өткөндөн кийин белгиленип, ага эң көп болуш алган эки талапкер кыташат

БИШКЕК, 12-окт. — Sputnik. Үстүбүздөгү жылдын 15-октябрында Кыргызстан эли 11 талапкердин ичинен президент шайлайт. Бирок IRI институтунун (International Republican Institute), маалыматы боюнча шайлоонун экинчи туру болушу мүмкүн.

Мындан улам Sputnik Кыргызстан агенттиги кайра добуш берүүнүн шарттарын жана жол-жоболорун билип көрдү.

"КР президентин жана Жогорку Кеңешинин депутаттарын шайлоо жөнүндө" мыйзамга таянсак, талапкерлердин бири добуш берүүгө келген шайлоочулардын 50 пайызынан көбүнүн добушун алса, ал жеңүүчү деп табылат. Андай болбой калса экинчи тур белгиленет.

БШК төрайымынын орун басары Абдыжапар Бекматовдун айтымында, экинчи турга биринчисинен эң көп добуш алган эки талапкер ат салышат.

"Мисалы, шайлоого эки миллион адам келди дейли. Талапкерлердин бири анын жарымынан көбүнүн, тагыраагы, бир миллиондон бир добуш болсо дагы ашык алса, шайлоо өтөсүнө жетти деп эсептелет. Ал эми бир дагы талапкер миллион добуштан ашык ала албаса, экинчи тур белгиленет. Эл тарабында эң жогору бааланган эки талапкер кайрадан шайлоого аттанат", — деди БШК төрайымынын орун басары Абдыжапар Бекматов.

Анын айтымында, экинчи турга өткөн эки талапкердин бири кандайдыр бир себептер менен шайлоодон четтесе, добуш топтоо жагынан андан кийин турган талапкер анын ордуна аттанат.

Экинчи тур шайлоонун жыйынтыгы расмий жарыялангандан эки жума өткөндөн кийин өткөрүлөт. Анда көбүрөөк добуш алган талапкер жеңүүчү деп табылат.

Бюллетенге эки талапкер жана "Баарына каршы" деген үч позиция киргизилет.

Экинчи турдун кызыктуу жери — шайлоочулар бюллетентен бир гана талапкердин атын көргөн учурлар болуп калышы ыктымал.

Бул боюнча мыйзамда "…Эгерде башка талапкерлер калбаган учурда, шайлоо бир талапкер менен өткөрүлөт" деп айтылат. Ал эми БШК өкүлү муну төмөнкүчө түшүндүрдү.

"Кээ бирде экинчи турга чыккан талапкерлердин бири кайсы бир себептер менен шайлоодон четтеп, андан кийинки талапкерлер дагы катышпай калышы мүмкүн. Ошондо бюллетенге бир гана талапкердин аты киргизилип, эл аны шайлай турганын же шайлабасын билдирет. Бирок бизде мындай болбойт деп ишенем. Анткени, кудайга шүгүр, бизде 10дон ашык талапкерибиз бар", — деди Бекматов.

Экинчи турдагы үгүт иштери жөнүндө айтсак, шайлоо дайындалган убакыттан баштап талапкер өзүн "мактоого" алса болот. Ага кеткен каражат шайлоо фондунда калган акчадан гана алынышы керек. Экинчи тур үчүн фондду толуктоого болбойт.

Эгер экинчи турда дагы бир да талапкер шайланбаса, Жогорку Кеңеш бир айдын ичинде кайрадан президенттик шайлоону белгилейт.

Тема:
Кыргызстандагы президенттик шайлоо - 2017 (252)

Тема боюнча

Президенттик шайлоодо чет жакта 18 миңден ашык киши гана добуш берет
Белгилер:
мыйзам, президенттик шайлоо, БШК, Абдыжапар Бекматов
Колдонуу эрежелериПикирлер

ЭҢ МААНИЛҮҮ