БИШКЕК, 15-дек. — Sputnik. Казакстандык мурдагы банкир жана оппозициячыл саясатчы Мухтар Аблязов Франциянын Liberation гезитине берген маегинде Кыргызстандагы 2005-жылкы революцияны каржылаганын айтты.
"2003-2005-жылдары мен Москвада жашап, диссиденттик ишмердүүлүк менен алектендим. 2005-жылдын башында Кыргызстандагы режимди кулатуу максатында алардын оппозициясын каржыладым. Мага постоветтик өлкөлөрдүн биринде демократиялык процесстердин башталышы, туура реформалардын жүргүзүлүш маанилүү болчу", — деп айткан Аблязов аталган гезитке.
Өзүнүн айтымында, ал бул кадамдары менен Кыргызстанды өз өлкөсүнө үлгү катары көрсөткүсү келген.
"Мен Кыргызстандагы демократиялык процесстер Казакстан үчүн үлгү болушун каалагам. Москвада жүрүп, 2004-жылы каттоодон өткөн "Казакстандын демократиялык тандоосу" партиясын уюштургам. Ошол эле жылдын сентябрь айында мага кол салуу болду. Менин көзүмдү тазалай албай калган Назарбаев сатып алууну чечти. Өз өлкөмдө оппозициянын тилектештери бар экенин көргөндө, кайтып келгем", — деп айткан экс-банкир маегинде.
Казакстандын "БТА Банкынын" мурдагы башчысы Казакстанда гана эмес, Россияда жана Европанын Украина, Швейцария сыяктуу бир катар өлкөлөрүндө издөөдө жүрөт. Ал эми Улуу Британия аны 22 айга эркинен ажыраткан.
Казакстан менен Франциянын ортосунда экстрадиция тууралуу келишим болбогондуктан, аны өткөрүп алууга азыр Россия менен Украина аракет кылып жатат.
Бирок ушул жуманын башында Франциянын мамлекеттик кеңеши Мухтар Аблязовду Россияга экстрадициялоо боюнча токтомду жокко чыгарып койду.
