БИШКЕК, 16-дек. — Sputnik. "Бүтүн Кыргызстан" жана "Эмгек" партияларынын тандеми жоюлганын уюм жетекчиси Адахан Мадумаров билдирди.
"Бүтүн Кыргызстан Эмгек" партиясы жыл башында биригип, парламенттик шайлоого чогуу аттанган. Октябрда тийиштүү көлөмдө добуш топтой албай, жетинчи орунда калган.
Мадумаровдун айтымында, тандемди жоюу демилгеси жергиликтүү кеңеш шайлоолоруна катышууга дилгирленип жаткан эки партиянын жаштар кыймылынан келип чыккан.
"Кеңейтилген саясий кеңеште жаштардын өз-өзүнчө иштөөсүнө мүмкүнчүлүк берели деп чечтик", — деди саясатчы.
Мадумаров "Эмгек" партиясынын жетекчиси Аскар Салымбеков менен жылуу мамилеси сакталарын баса белгиледи.
