Алгач БШК Автоматтык түрдө санаган электрондук урнанын (АСУ) эсебинин негизинде чыгарылган алдын ала маалыматты жарыялайт. Андан соң кол менен саноонун жыйынтыгы чыгат.
2021-жылдагы Жогорку Кеңешке шайлоо жаңы система менен өтөт. Анда 54 депутат партия аркылуу келсе (пропорционалдык система), 36сы бир мандатуу округдан шайланат. Бул система мажоритардык деп аталат. Анда ар бир округда ашык-кеми менен 100 миң шайлоочу болот. Алар бир талапкерди тандайт. Аймактык өзгөчөлүгүнө жараша биринде 80, экинчисинде 120 миң болуп калышы мүмкүн. Эгер эки талапкер бирдей добуш алып калса, шайлоо комиссиясына катталуу үчүн биринчи болуп документ тапшырганы жеңүүчү аталат. Башында бир мандаттуу округдан шайлоого 320дай талапкер аттанган. Кийин алардын бир бөлүгү ага катышуудан баш тартты. Партия жана бир мандаттуу округдан аттанган талапкерлерди кошкондо Жогорку Кеңештин жетинчи чакырылышына 90 депутат өтөт.
Жогорку Кеңешке шайлоонун акыркы жыйынтыгы 18-декабрда маалым болот. Эгер бир мандаттуу округдан барган депутат парламенттен кетсе, эки айдын ичинде анын ордуна башка бирөөнү тандоо үчүн шайлоо өтөт.
Эске салсак, былтыркы 2020-жылдын 4-октябрында өткөн Жогорку Кеңешке шайлоонун жыйынтыгы 5-6-октябрдагы окуялардан кийин жараксыз деп табылган.
