БИШКЕК, 13-окт. — Sputnik. Казакстандын укук коргоо органдары тарабынан өлкө ичиндеги коопсуздук боюнча иш-чара жүргүзүлүп жаткандыктан, Кыргызстандын Тышкы иштер министрлиги, Казакстандагы элчилик жана Алматы шаарындагы консулдук ал жактагы кыргыз жарандарынын акыбалын бирлегикте карап жатат. Бул тууралуу ТИМдин маалымат кызматынан билдиришти.
Анда айтылгандай, Кыргызстандын Казакстандагы өкүлчүлүктөрү тиешелүү органдар менен өткөргөн жолугушуусунда казак тарап "Нелегал-2017" деген аталыштагы операцияны өткөрүп жатканын жана ички иштер органдары атайын кыргыз жарандарына каршы иш-аракеттерди жасоодон алыс экенин айтышкан.
"Элчилик жана консулдуктун кызматкерлери ар дайым кыргыз диаспорасынын өкүлдөрү менен байланышта. Миграция боюнча көйгөй жаралып калган жарандардын иштеген жерине барып, маселени чечүүгө жардам берип жатышат", — деп айтылат ТИМдин билдирүүсүндө.
Кыргызстадын Казакстандагы элчилиги: Астана шаары, Дипломатиялык шаарча, В-5, байланыш телелефону: (+7 7172) 242024, (+996 312) 979701.
КРдин Алматы шаарындагы генералдык консулдугу: Алматы шаары, Луганский көчөсү, 30А, байланыш телефону: (+7 7272) 642212, 622173, 642212.
Ошондой эле министрлик коңшу өлкөдөгү кыргыз жарандарын ар кандай кыйчалыш кырдаалдарга тушукпашы үчүн миграциялык шарттарды бузбоого үндөйт.
