БИШКЕК, 10-дек. — Sputnik. Борбор калаада өткөн түнү болгон атышууга тиешеси бар деп шектелип эки бала кармалды. Бул тууралуу журналисттерге ички иштер министри Кашкар Жунушалиев билдирди.
Эске салсак, 9-декабрда Бишкектин Асаналиев жана Гагарин көчөлөрүнүн кесилишинде ок атылганы маалымдалып, төрт машина жабыркаганы айтылган. Ишенимдүү булактар анда уюшкан кылмыштуу топтун мүчөлөрү жаңжалдаша кетип, үч киши түрдүү жаракат алганын кабарлаган. ИИМ расмий маалымат таратып, ал жерде балдар чатакташа кеткенин жазды.
"Жаңжалдашуудан жабыркагандар уюшкан кылмыштуу топтун мүчөлөрү. Кол салгандар Жалал-Абад облусуна караштуу Токтогул районунун 24 жаштагы эки тургуну экен. Алардын жанында "Макаров" үлгүсүндөгү курал болгон", — деп айтылат ИИМдин билдирүүсүндө.
Бул факты КР Жазык кодексинин 39-130-беренесине («Адам өмүрүнө кол салуу») ылайык, Кылмыш жана жоруктардын бирдиктүү реестрине каттоого алынды.
Жабыркагандар Бишкектеги Травматология жана ортопедия илим-изилдөө борборуна жеткирилген.
Сурак маалында чатакташкан тараптардын 1,5 жылдан бери бири-бири менен пикирлери келишпей жүргөндүгү белгилүү болду.
