БИШКЕК, 2-окт. — Sputnik. ИИМдин Россиядагы өкүлчүлүгүнүн кызматкерлери Москва шаардык милициясы менен биргеликте Кыргызстанда алдамчылыкка шектелип издөөдө жүргөн кишинин жүргөн жерин табышты. Бул туурасында аталган министрликтин маалымат кызматы билдирди.
Россиянын Красноярск аймагынын 50 жаштагы Ю.Н. аттуу тургуну ири суммадагы акчаны алган деп шектелип, эл аралык издөөдө жүргөн.
"2016-жылы ЖЧКнын директору болуп турганда чийки нефтини жеткирип берүү үчүн 328 604 долларга келишим түзгөн. Нефтини алгандан кийин эркек киши из жашырып кеткен. ЖЧКнын чыгымы 22 миллион 696 миң 400 сомду түзгөн", — деп айтылат маалыматта.
Аталган факт боюнча Ю.Н. аттуу адамга эски Кылмыш-жаза кодексинин 166-беренесинин («Кызмат абалынан пайдаланып ири суммадагы алдамчылыкка баруу») бир нече бөлүктөрү менен иш козголгон. Экономикалык кылмыштуулукка каршы күрөшүү мамлекеттик кызматы ага эл аралык издөө жарыялаган.
ИИМден учурда шектүүнүн жүргөн жери аныкталып, аны экстрадициялоо иши каралып жатканын билдиришти.
