ЫСЫК-КӨЛ, 20-cен. — Sputnik. Ысык-Көлдө беш кишинин өмүрүн алган кырсыкка себепкер BMW X5 үлгүсүндөгү унаанын ооруканадагы айдоочусу Каракол шаарынын тергөө абагына которулду. Бул тууралуу Облустук ички иштер башкармалыгынын маалымат кызматынын өкүлү Сталбек Усубакунов билдирди.
Анын айтымында, дарыгерлер 41 жаштагы Ф.Е. аттуу айдоочу аялдын абалы жакшырып калгандыгына байланыштуу 16-сентябрь күнү аны ооруканадан абакка которууга уруксат беришкен.
"Жол кырсыктын кесепетинен BMW X5 унаасынын айдоочусунун далысы сынып кеткен. 16-сентябрга чейин ал Ысык-Көл райондук ооруканасынын травматология бөлүмүндө жаткан. Азыр анын абалы жакшырып калгандыктан тергөө абагына киргизүүгө болот. Буга дарыгерлер уруксат берди. Эми аял сотко чейинки териштирүү иштери аяктаганча камакта болот", — деди Усубакунов.
Сот айдоочунун баш коргоо чарасын тандаган. Ага ылайык, 41 жаштагы аял 3-ноябрга чейин Каракол шаарындагы №3 тергөө абагына киргизилмей болгон. Бейтап ооруканадан чыга электигине байланыштуу соттун мындай чечими күчүнө кире элек эле.
