БИШКЕК, 20-авг. — Sputnik. Милиция Суусамырдагы үрөй учурган жол кырсыкта Honda Torneo унаасынын качып кеткен айдоочусу Талгатбек Алтымышовду табышууга жардам сурайт. Бул туурасында Чүй ОИИББдин маалымат кызматынан кабарлашты.
Эске сала кетсек, 18-август күнү саат 10.00дөр чамасында Бишкек — Ош трассасынын 174-чакырымында бензовоз менен эки жеңил унаа кагышканы маалымдалган. Тагыраагы, Man үлгүсүндөгү жүк ташуучу унаа бензин жүктөп Бишкектен Ош шаарын көздөй бара жаткан. Ал эми жолдун каршы тилкесинде Mazda CX-7 автосу келе жаткан. Трассанын 174-чакырымында жеңил автону Honda Torneo ашып өтөм деп каршы тилкеге чыгып, алдыда бензовоз келе жатканын көрүп калган. Мындан улам өз тилкесине бурулам деп Mazda унаасын сүзгөн. Ал эми бир үй-бүлө бараткан автокөлүк жүк ташуучу унааны барып каккан. Кырсыктан улам бензовоз оодарылып, эки жеңил унаа трассадан чыгып кеткен. Бензовоз менен Honda Torneo автосунун айдоочулары жабыркаган эмес.
Факты Кылмыш жана жоруктардын бирдиктүү реестрине каттоого алынып, тийиштүү экспертиза дайындалган.
"Күбөлөр жол кырсыгына Honda Torneo унаасынын айдоочусу күнөөлүү экендигин айтып беришти. Ал 24 жашта, Талас облусунда төрөлгөн. Алгачкы медициналык жардам алгандан кийин из жашырып кеткен. Учурда анын жүргөн жерин аныктоо үчүн бардык аракеттер көрүлүп жатат", — деп айтылат маалыматта.
Милиция айдоочу тууралуу маалыматы барлардан төмөнкү номерлерге байланышып коюуну өтүнөт.
Жайыл райондук ИИБдин күзөт бөлүгүнүн номери 0(312) 22-15-58, 0555 (29-95-20), 0(701) 31-41-93 же 102.
