ОШ, 6-мар. – Sputnik. Кара-Суу районунун Кара-Дөбө айылындагы Мамасалы Тешебаев атындагы орто мектебинин беш окуучу кызын бейтааныш эркек киши алып кетүүгө аракет кылды деген маалымат текшерилип жатат. Бул тууралуу аталган мектептин директору Бактыгүл Нурматова Sputnik Кыргызстан агенттигине билдирди.
Мектеп директору Нурматованын айтымында, 3-класста окуган беш окуучу кыз 2019-жылдын 27-февралында сабактан 13:00дө чыгып, бирок үйлөрүнө 14:30 чамасында барган.
"Алардын ата-энелери эмне үчүн кеч келгендигин сураганда окуучу кыздар аларды бейтааныш эркек киши унаасына салып кетүүгө аракет кылгандыгын айтышкан. Бул окуя ата-энелердин катышуусунда териштирилди. Мындан сырткары, аймактык тескөөчү жана жаш өспүрүмдөр менен иш алып барган инспекторлор окуучу кыздардан окуянын кандайча болгондугун сурап, иштеп жатышат. Бирок иликтөө көрсөткөндөй, мектептен чыгаары менен үйүнө түз барбай көчөдө ойноп, кеч барышкан. Алар ата-энелери урушат деп корккондуктан жогоруда сөз болгон окуяны айтабыз деп сүйлөшүп алышкандыгы аныкталды", — деди Нурматова.
Ал инспекторлор окуучу кыздардын ар бирин өз алдынча сураганда калп айтышкандыгы белгилүү болгондугун кошумчалады.
