БИШКЕК, 6-фев. — Sputnik. Прокуратура табып Хашым Зайналиевдин ишине тыюу салууну өтүнүп Бишкектин Октябрь райондук сотуна арыз жиберди. Бул туурасында Башкы прокуратуранын маалымат кызматы билдирди.
Ага ылайык, саламаттык сактоо тармагындагы тийиштүү органдардан Зайналиевге лицензия берилген эмес. Ошондуктан бул органдар анын ишмердүүлүгүн текшерип, көзөмөл кылууга укугу жок болгон.
"Кыргыз Республикасында жарандардын саламаттыгын сактоо жөнүндөгү" мыйзамдын 5 ("Медициналык жана фармацевттик ишти лицензиялоо") жана 15-беренелери ("Элдик медицина менен алектенүү укугу") боюнча медициналык иштер менен алектенген тараптар мамлекеттик органдардан атайын уруксат алышы керек.
Белгилей кетсек, табып Хашим Зайналиев алдамчылыкка шектелип, өткөн жылдын 22-декабрында кармалып тергөө абагына киргизилген. Бир айдан кийин сот анын эч жакка чыкпоо боюнча тил катынын негизинде кое берген.
