БИШКЕК, 5-фев. — Sputnik. Бүгүн болжол менен саат 15.30да Бишкекте бомба тууралуу эки жолу чалып кабарлашты. Бул туурасында шаардык милициянын маалымат кызматы билдирди.
Авиакассанын кызматкерлери эвакуацияланып, жеринде атайын кызматтар иштеп жатат.
Ал эми "Манас" эл аралык аэропортундагы бомба тууралуу УКМКга билдирүү саат 15:09да келип түшкөн. Окуя болгон жерге УКМК менен ИИМдин кызматкерлери дароо келип, аэропорттогу жүргүнчүлөр менен кызматкерлер коопсуз жайга чыгарылган. Кийинчерээк жалган маалымат экени аныкталып, аба майдандын айланасынан эч нерсе табылган эмес.
"Манастагы" бомба тууралуу коркутуу Кыргызстандагы авиакомпаниялардын электрондук почтасына 14.41де келген. Катта аны жардыруу үчүн таймер колдонулаары жазылган. УКМК бул коркутуу чет өлкөдөн жасалганын билдирди.
