БИШКЕК, 2-дек. — Sputnik. Бишкекте бөбөктүн өйдө туруусун талап кылып аны белге тепкен киши кармалды. Бул тууралуу Sputnik Кыргызстан агенттигине Бишкек ШИИБдин маалымат катчысы Адыл Оморов билдирди.
Бүгүн кечке жуук социалдык тармактарга кызыл куртка кийген эркек киши жерде жаткан бөбөктү белге тээп тургузуп, колуна кармап жулкулдатып алып кеткен видео жарыяланган. Анын алдына окуя бүгүн Бишкектин “Улан 2” кичи районунда болгону жазылган.
“Видео интернетке жарыялангандан кийин Октябрь РИИБдин кызматкерлери ыкчам-издөө иштерин жүргүзүп баланы тепкен жаран кармалды. Ал Октябрь райондук милиция бөлүмүнө алып келинип тергөө иштери жүрүп жатат”, — деп айтылат билдирүүдө.
Аталган видео интернетке жүктөлгөндөн кийин балага боору ооруган эл ал кишини жазага тартууну талап кылып социалдык тармактарга жайылта башташкан.
