БИШКЕК, 2-дек. — Sputnik. Социалдык тармакта эркек киши жерде жаткан бөбөктүн өйдө туруусун талап кылып тээп жаткан видео жарыяланды.
Аталган видео Кыргызстандын интернет айдыңындагы omks_video аттуу Instagram аккаунтуна бүгүн, 2-декабрда саат 18.40да жүктөлгөн.
Кадрдан көрүнгөндөй эркек киши (атасы болушу мүмкүн) көчөдө кар жаап жаткан маалда жерде жаткан бөбөктү сыртынан карап турат. Бала өзү турууга аракет кылып жатып кайра жыгылып түшөт. Андан соң жанагы киши барып бөбөктү белге бир тээп, колунан кармап жетелеп кетет.
Видеонун алдында окуя бүгүн Бишкектеги "Улан 2" кичи районунда болгону жазылган. Балага боору ооруган интернет колдонуучулары видеодогу кишини жазага тартууну талап кылышууда.
Бул боюнча азырынча Бишкек ШИИБдин маалымат кызматы менен байланышууга мүмкүн болбоду.
