БИШКЕК, 3-окт. — Sputnik. Казакстандын Жарандык авиация комитети Алматы шаарынан 28 чакырым аралыкта санитардык авиация учагынын кыйрашынан каза болгондордун арасында кыргызстандык жаран бар экенин билдирди. Бул тууралуу Sputnik Казакстан агенттиги жазып чыкты.
Кырсык бүгүн кечинде болгон. Абага көтөрүлгөндөн 12 мүнөт өткөн соң Ан-28 учагы радардан жоголуп кеткен. East Wing авиакомпаниясына таандык учак медициналык жардам көрсөтүү максатында Алматы — Шымкент каттамы боюнча багыт алган.
“Учак абага көтөрүлгөндөн кийин жерге кулап, андан соң өрт чыккан. Ичинде беш киши болгон. Кеменин командири Кыргызстандын жараны Г.Н.Цой, ал эми экинчи учкуч Казакстандын жараны Е.Кутафин болуп чыкты”, — деп айтылат маалыматта.
Ан-28 аба кемеси 1990-жылы Польшадан чыккан. Ушу тапта өлкөнүн Транспорт министрлигинин өкүлдөрү кырсык болгон жерде иш алып барууда.
