БИШКЕК, 25-июл. — Sputnik. Кара-Балтада массалык мушташ катталганын Sputnik Кыргызстан агенттигигине укук коргоо органдарындагы булак билдирди.
Маалыматка караганда, окуя 22-июлдан 23үнө караган түнү Жайылдын Степное айылында болгон.
Айылда үлпөт той маалында коноктордун арасындагы башка айылдын балдары менен жергиликтүүлөрдүн ортосунда жаңжал чыккан.
"Алгач жергиликтүү балдар конокторду сабап койгон. Алар Алексеевка айылына кетип, кайра үч машина балдарды алып келип массалык мушташ чыккан. Милиция болжол менен түнкү саат 2.00дө барып, 24төн 29 жашка чейинки 30 адамды кармаган. Балдардын колунда курал жана союл болгон. Бир киши чачма октон жаракат алган", — деп айтылат маалыматта.
Чүй ОИИБдин маалымат кызматы аталган окуя болгонун тастыктап, кийинчерээк толугураак маалымат берүүнү убадалады.
