БИШКЕК, 11-апр. — Sputnik. Чүй облусуна караштуу Москва райондук сотунда кылмышка шектүүлөрдү кыйнаган деп айыпталып жаткан милиция кызматкерлеринин соттук иши каралууда. Бул тууралуу Башкы прокуратура билдирди.
Кылмыш иши 2015-жылы 3-апрелде козголгон. Ага ылайык, милиция кызматкерлери үч жаранды кыйнап, 33,5 саат мыйзамсыз түрдө камаган деп айыпталууда.
"Айыпталуучулардын арыз жазгандарга кысым көрсөтүп жатканы аныкталды. Мындан сырткары, 16-мартта жана 24-мартта жабырлануучуларга белгисиз номерден бирөөлөр чалып, түрмөдөн байланышып жатканын, эгерде арызын албаса өмүрүнө коркунуч келерин айтышкан", — деп жазылат маалыматта.
Ушундан улам мамлекеттик айыптоочу соттолуучуларды камакка алуу боюнча сотко өтүнүч келтирген. Ошол эле күнү сот өтүнүчтү канааттандырып, айыпталуучуларды №1 убактылуу кармоочу жайга камакка алды.
