БИШКЕК, 13-мар. — Sputnik. Ички иштер министри Улуу Ата Мекендик согуштун ардагери Леонид Тузовго кол көтөрүп, тоноп кеткен ишти иликтөөнү жеке өзүнүн көзөмөлүнө алды. Бул туурасында аталган министрликтин маалымат кызматы кабарлады.
13-мартта саат 11:42де "102" кызматына Бишкектин Ленин районунда жашаган Леонид Тузовго кол салуу болгондугу тууралуу маалымат түшкөн.
Учурда Ленин райондук ИИБдин тергөө бөлүмү бул факты боюнча кылмыш ишин козгоо максатында тиешелүү иштерди жүргүзүүдө. Милициянын айтымында, мындай учурда ал Кылмыш Жаза кодексинин 168-беренесине (Каракчылык) туура келет.
Кылмышкерлердин изине түшүү үчүн милиция ыкчам-тергөө иштерин жүргүзүп, окуянын болгон жерин иликтеп жатат. Учурда кол салган аялдардын болжолдуу сүрөтү тартылып, издөө иштери уланууда. Ички иштер министри ардагерди тоноо боюнча иштин бетин ачууну жеке өзүнүн көзөмөлүнө алды.
