БИШКЕК, 2-мар. — Sputnik. Тоң районундагы Калкагар айылында кутурган карышкыр бир үй-бүлөнүн малын толугу менен кырып, дагы бир нече малды тиштеп салгандыгы тууралуу Sputnik Кыргызстан агенттигине жергиликтүү кабарчы билдирди.
Карышкыр алгач Жекшенбек Мамбеталиев аттуу жарандын короосуна кирип, 35 кой-эчки, бир тайын тиштеп салган.
"Таңкы беште короого кирсем карышкыр ичинде экен. Коркуп кетип үйгө чуркадым, анын үстүнө куралым дагы жок эле. Мен үйдөн чыксам, жырткыч короодон чыгып кетти. Сегиз койду өлтүрүп, калгандарын тиштеп салыптыр. Үй-бүлөмдү ушул мал менен бакчумун. Азыр бир баш коюбуз калбай, эмне кыларыбызды билбей турабыз", — деди Мамбеталиев.
Андан соң карышкыр айыл тургунуна кол салууга аракет кылганда, ал атасын жардамга чакырып, экөөлөп карышкырды жок кылышкан.
Карышкыр тийген малдын өлүктөрү өрттөлгөнүн Тоң райондук ветеринардык жана фитосанитардык коопсуздук боюнча башкармалыгынын башчысы Серең Жумакадыров билдирди.
"Карыштыр кол салган малдын баарын текшерип чыктык. Анын жыйынтыгы менен жырткычтын кутурма оорусу бар экени аныкталган. Азыр бир нече жандык көзөмөлгө алынды. Ал эми тиштелген малдын баарын өрттөдүк", — деди ал.
Кечээ Калкагар айылында алты кой, бир эшек, үч ит ветеринардык талаптарга ылайык жок кылынды.
