БИШКЕК, 10-фев. — Sputnik. Бейшемби күнү кечинде Бишкектин борборунда айдоочу автоинспекторго баш ийбей аны сүзүп, окуя болгон жерден кетип калганын Кайгуул милициясы Sputnik Кыргызстан агенттигине билдирди.
Маалыматка ылайык, окуя саат 18.30дар чамасында Киев жана Тыныстанов көчөлөрүнүн кесилиши жакта болгон. Аталган жерде Mercedes үлгүсүндөгү машина арт жагындагы мамлекеттик номери жок турган.
"Биздин айым кызматкерибиз машинанын арт жагындагы мамлекеттик номери эмнеге жок экенин билүү үчүн барган. Айдоочу анын айткандарына баш ийбей, жөөлөп кеткен. Ал дароо кармалды. Бир аз гана узап кетүүгө үлгүрүптүр", — деп Кайгуул милициясы билдирди.
Айдоочу Биринчи Май РИИБине алып келинген. Кармалган жаран Сокулук районунун 31 жаштагы тургуну экени аныкталды. Учурда тергөө амалдары жүрүп жатат.
Ал эми жабыркаган милиционердин бутунун булчуңдары чоюлуп, дарыланууда.
