БИШКЕК, 5-ноя. — Sputnik. 1993-2002-жылдары Кыргызстандын мамлекеттик жогорку органдарынын кызматкерлери чет өлкөлүк банктардын өкүлдөрү менен сүйлөшүп алып, өнөр жайды өнүктүрөбүз деген шылтоо менен сырттан кредит алуу жана чыгаруу боюнча коррупциялык схеманы уюштурган. Бул тууралуу УКМКдан кабарлашты.
Ага ылайык, жалпысынан бир миллиард долларга жакын акча чыгарылган.
Насыялар чет элдик банктардан кыргыз өкмөтүнүн кепилдиги менен тамак-аш, жеңил жана фармацевтика өнөр жайын, тоо-кен тармагын өнүктүрүүгө жана таштандыларды кайра иштетүүчү заводдорду курууга деп алынган.
"Кара-Балта тоо-кен комбинаты" ААКсы, "Жибек-Жолу"АКсы, "Казкоммерцбанк" ААКсы, "Жылдыз" АКсы, Кыргызпотребсоюз, "Жанар" АКсы, "ЧАК" ЖЧКсы (Чүй агроөнөр жай ишканасы), "Ала-Тоо" мейманканасы жана ресторан комплекси, "Кыргыз агробизнес компаниясы" ААКсы, "Буудай" мамлекеттик ишканасы жана башкаларга 1 миллиард долларга барабар 40тан ашуун кредит бөлүнгөн", — деп айтылат билдирүүдө.
Экс-премьер Абылгазиевге кылмыш иши козголобу? Башкы прокурордун жообу
УКМКнын маалыматы боюнча, эл аралык банктарга насыяларды төлөө үчүн республиканын алтын-валюта резервинин бир бөлүгү күрөө катары коюлган.
"Ошол эле учурда насыя каражаттары өлкөгө түшпөй эле чет өлкөлөрдө жайгашкан башка чет элдик банктардын эсебине которулган. Кийин кредит алган ишканалар банкрот болуп калганын айтып төлөбөй коюшкан. Ал эми сырттагы банктар күрөөгө коюлган алтынды алышкан. Ошондой эле тергөө мамлекет ушул күнгө чейин жеке насыялар боюнча төлөмдөрдү жүргүзүп жаткандыгын аныктады", — деп билдирди атайын кызмат.
Учурда Кылмыш-жаза кодексинин 319-беренеси ("Коррупция") менен козголгон иштин алкагында ыкчам тергөө иштери уланууда.
