БИШКЕК, 25-дек. — Sputnik. Кыргызстандын мамлекеттик органдары жаңы жылдык белекке 23,5 миллион сомдой акча коротот. Бул туурасында Мамлекеттик сатып алуулар порталынын расмий сайтында айтылат.
Маалыматка ылайык, кызматкерлерге, аз камсыз болгон үй-бүлөлөргө жана социалдык жактан жардамга муктаж болгондорго белек берүү үчүн жүздөй тендердин арызы коюлган.
Биринчи үчтүккө "Түндүкэлектр" ишканасы (2,5 миллион сом), "Эл аралык "Манас" аэропорту" (1,8 миллион сом) жана президент менен өкмөттүн иш башкармалыгы (1,6 миллион сом) кирет.
"Түндүкэлектрдин" маалымат кызматы белектерди кызматкерлерге жана балдарга бере турганын билдирди.
"Бизде үч миңдей адам эмгектенет, көбүнүн майда балдары бар. Башка компаниялар сыяктуу коллективдик келишим каралган. Анын негизинде кызматкерлердин балдарына белек ыйгарылат", — деп айтышты мекемеден.
100 миңге чейинки белекти региондордогу 49 бирикме алат. Ал эми 40 бирикме 100 миңден 500 миңге чейинки белекке каражат коротот.
